अवधी बंदना

अवधी बोली का कोई जवाब नहीं है। हमहूं अवधी वाले हन। हमका याक कबिता यादि आवति है वंशीधर शुक्ल की। हमार मन कहिसि तुम सबका सुनाई। तौ लेउ आनन्द-

अब जिउ मां धरु धीर, राम की प्यारी अवधी बोली
बारह जिला अवध के ब्वालें और अगरा के आठ
रीवां, विंध्य, अमरकंटक, से छत्तिसगढ़ लौं पाठ
बुंन्देलिन अवधी की चेली, कनवज वाली बांदी
ब्रजभाषा सबकी मुंहचुमनी, भोजपुरी उदमादी
तुइ पर मस्त गंवार गंवारिन, हंसिहंसि करैं चबोली।
अब जिउ मां धरु धीर, राम की प्यारी अवधी बोली।

तोर सब्द उर्दू अपनाइस, अंगरेजी उरु कीन्हिंस
बोली खड़ी बुलंदशहर की, दांते अंगुरी दीन्हिस
देखि प्रवाह चरित का चित्रण छन्द, गीत, धुनि धारा
दुनिया भर की सगरी बोली, जोरि न सकीं अखारा
तोरी नीति, कहावत, कबिता, जग की करैं, ठठोली।
अब जिउ मां धरु धीर, राम की प्यारी अवधी बोली।

कजरी, ठुमरी, बारामासा, बेला, बिरहा, कहरा
लहचारी, निरवाही, सोहर, पचरा, भजन, टहकरा,
पंडाइन, माधवा गर्जना, आल्हा, गोपीचंदा
पाटन, टूमै, बरवा, बरुवा, बिबिध मंत्र औ छंदा
सबै गीत रस तोरे अनुचर, तुइ सबसे अनमोली।
अब जिउ....

कलकत्ता, कश्मीर, सिंधु, लंका लौं तोरि दुहाई
कटनी, सागर, नागपूर मां, तोरिय है बपदाई
यहिते कृष्णायन के लेखक तोरइ लिहिन सहारा
महाकाब्य है निरस न जब लैं, तोरि होय ध्रुवधारा
सब भाखन का शासन पालिसि, तुइका जनता भोली।
अब जिउ....

तोरे कमर कमर कसे बिन तोरेइ तृन बीनिस ब्रजभासा
बंगला, उड़िया, मारवाड़, बोलिन का बनी तमासा
तुहिका सीख का देश भरे मां, निरभय बोलै चालै
तोरे व्यंग, कटाक्ष, कटीले, सुने जमाना हालै
त्वहे आदि हिन्दी की दुनियां की, चंद्रोदय की गोली
अब जिउ...

जौन बात चाहै जो लेखक, जस की तस लिख डारैं
औंरा लगै न हर्र फटकरी, च्वाखा रंग निखारै
सूर, कबीर, रहीम आदि कबि, लिखिन तोरि गुनगाथा
तुलसी की रामाइन पर, सब जगतु झुकाइस माथा
अब सिर छत्र धारि कै बिचरौ, सब बोलौ यह बोली
अब जिउ....

(रचनाकाल 1952)